د هند د فلمونو د سانسور ادارې جنجالی فلم ته اجازه ورکړه

د هند د فلمونو د سانسور ادارې د بالیووډ هغه فلم ته د خپرېدو اجازه ورکړه چې د یوې هندویې ملکې او مسلمان پاچا پر اړیکو جوړ شوی دی.

د سختدریځو هندوانو ګوند یوه مشر د دې فلمی ستوری د وژلو پر سر نژدې یو نیم ملیون ډالره انعام ایښی و.

د هند د فلمونو د تصدیق مرکزی ادارې د پادمواتی (Padmavati) فلم په اړه دا پرېکړه پرون /شنبه/ په داسې حال کې وکړه چې د هندوانو سختدریځو ډلو اعتراضونو ته دوام ورکړ.

په نوومبر کې د هند سترې محکمې په نړۍ کې د دغه فلم د خپرېدو د مخنیوی لپاره د یوه مدافع وکیل غوښتنلیک رد کړ.

د هندوانو ځینو ډلو او دغه راز د واکمن بهارتیا جنتا ګوند یو شمېرغړیو دا فلم غندلی، د هغه ډایرکتر یې تورن کړی چې په دې فلم یې تاریخ زیانمن کړی دی.

دې فلم د هندوانو د راجپوت د کورنۍ له ملکې پدماوتی سره د مسلمان پاچا علاالدین غلجی د مینې کیسه انځور کړې ده.

د پادماواتی (Padmavat) کیسه په همدې نوم د ۱۶ پېړۍ له یوه تصوفی حماسی شعر څخه اخیستل شوې ده چې د راجپوت یوه زړه وره او ښکلې ملکه د دې لپاره چې د ډیلی پښتون پاچا علاالدین غلجی (خلجی) یې ژوندۍ ونه نیسی، غوره ګڼی چې ځان ووژنی.

د پېړیو په اوږدو کې دا حماسه، سره له دې چې تاریخی اسناد یې نشته، په تاریخ بدله شوې ده.

د هریانا د شمالی ایالت د بهارتیا جنتا ګوند مشر سورج پال امو تېره (نوومبر) میاشت د فلمی ستوری دیپیکا پادوکون (Deepika Padukone) او د فلم جوړوونکی سنجې لیولا بهانسال پر سر جایزه اعلان کړه.

د دغه فلم جوړوونکی یا پرودیوسر د فلم خپرول، چې ټاکل شوې وه د دسمبر په لومړۍ یې په سینماګانو کې خپور کړی، وځنډاوه.

ستاسو اعلانات دلته

About خبرونه څانګه

This site uses Akismet to reduce spam. Learn how your comment data is processed.