د خیال ژوندی خیالونه

لیک: امان الله نصرت
(یو لیک یوه یادونه)

افسانه له افسون څخه اخیستل شوې چې معنا ېې جادو او سحر دی همدا لامل دی چې هر افسانه لیکونکی هڅه کوی خپله کیسه په داسې انداز ولیکی چې په لوستونکی ژور تاثیر وکړی او هغه د خپلو خبرو له قوی اغیز او سیوری لاندې راولی۰

افسانه د پخوانیو فرهنګونو له مخې د زړو او تېرو وختونو کیسو ته ویل کېږی یا په بل عبارت افسانه د خلکو په عامه ژبه کې هغه دودیزې کېسې دی چې د لوستونکو د پام اړولو ، متاثرولو او سرګرمیو لپاره پکې خیالی او فرضی یا مجازی پېښو ته ځای ورکړ شوی وی او هغوی پرې د حقیقت تر بریده ګومان او باور وکړی ۰

په افسانه کې فرضی یا مجازی کیسو ته چې حقیقت ونه لری ژبه خوندونه او رنګونه ورکول کیږی او یا هم ځینې واقعی او رښتینې پېښې او سرګذشت د فرضی او افسانوی کیسو په بڼه د لوستونکو د تفریح او بوختیا لپاره ځانګړې او لیکل کېږی۰

پښتو افسانه زمونږ د فولکلور یوه ستره، بډایه او ارزښتمنه او د پام وړ برخه ده چې د چاپېریال بېلابېلې فرهنګی، دینی، ټولنیزې، رومانی، حماسی او اخلاقی برخې پکې خوندی او ژوندۍ ساتل کېږی او د یوې فولکلوریکې شتمنۍ او پانګې په توګه ورته په خپله غېږ کې ځای ورکوی۰ افسانه د ټولنې وګړو ته د پیغام رسولو، عامه پوهاوی او اخلافی او ټولنیزو ښېګڼو د درس ورکولو غوره او اسانه لار ده چې د ښو او ګټورو بدلونونو لامل کېږی او د ټولنې د اصلاح او خیر ښېګڼې مثبته ګټه ترې اخیسل کېدای شی۰
اوس به راشو د ښاغلی خیال د افسانو دې کتاب ته چې د چاپ په ګاڼه پسولل شوی اوستاسو په لاسونو کې دی، له خیال صاحب سره زما د پېژندګلویۍ ډیر لږوخت کېږی او هغه هم څه موده مخکې مو د منګل په کتاب کور کې سره ولیدل۰
د ښاغلی خیال افسانې مې ولوستلې او ډیر خوند مې ترې واخیست، د خیال په افسانو کې دده د لوړو خیالونو او ژورو فکرونو څرکونه له ورایه تر سترګو کېږی۰
لیکوال هڅه کړې چې په ډېره ځیرکتیا او ماهرانه انداز خپله فرضی او خیالی کیسه او واقعه د لوستونکی ذهن ته وردننه کړی او د هغه په فکر د خپل خیال د اغیز ښاپېرۍ ورکښېنوی۰
د خیال صاحب د افسانو کمال په دې کې دی چې لوستونکی مجبوروی چې تر پایه ېې بدرګه کړی او په لوستلو ېې د ستړیا او بوج احساس ونه کړی۰
د ښاغلی خیال د افسانو کتاب د پښتو د فولکلوریک ادب د بډاینې یوه ارزښتمنه هڅه ده چې سترګې ترې نه شی پټیدلای
نور نو تاسو درانه لوستونکی به د ښاغلی خیال خیالی افسانې خپله ولولۍ او په اړه ېې قضاوت او پرېکړه تاسو ته پرېږدم۰
زه قدرمن خیال صاحب ته ددغه ارزښتناک کتاب د چاپ مبارکی وایم او تمه لرم چې په راتلونکی کې هم ګران خیال د تېر په څېر خپلې مورنۍ ژبې او پښتو ادب لپاره تلپاتې او د قدر وړ خدمتونه وکړی تر څو دا ژبه د نړۍ د نورو ژبو سیاله او د پرمختګ لوړو پوړیو او ګلالیو پړاوونو ته ورسېږی۰

بس همدومره

۷، ډسمبر ۲۰۱۸ پېښور

ستاسو اعلانات دلته

About داود جبارخیل

داود جبارخیل د وي او ای ډیوه خبریال دی له ۱۹ کالو څخه له یوشمر داخلی او خارجې رسینو او یوشمیر د پښټو پاڼه سره د پښتو ،ا دب ، او کلتور دافغانانواو ښځو ستونزو باندی ځانګړي مقالي او راپورنه ليکي اوس باوري خبري سرچینې سره همکارده

This site uses Akismet to reduce spam. Learn how your comment data is processed.