د کونډې د زوی فلم

لیکنه: سردار محمد همدرد

ډرامې او فلمونه په هر هېواد او ټولنه کې توپیر کوی. له کلتوری او مذهبی اړخه ژور فرق کوی؛ بلکې د ذوق له مخې هم سره متمیز دی. ځینې هېوادونه پر ډرامو، فلمونو او سریالونو زیاته پانګونه کوی، چې په دې برخه کې هندوستان او ترکیه د کرښې په سر کې راځی. مګر ځینو نورو هېوادونو بیا دې برخه ته چندانې پام نه دی کړی.

زما موخه مسلکی بحث کول نه دی؛ ځکه چې نه په دې برخه کې کافی مطالعه لرم او نه هم د ډرامو او فلمونو له زیاتو کتونکو څخه یم. ذوق هم له فلمی محتوا سره تړلی دی. ځینې خلک د جنګی فلمونو ډېر لېواله وی، چې زمونږ د هېواد خلک هم له دغه ډول فلمونو سره زیاته علاقه لری.

د پښتو ډرامو او فلمونو په تړاو مې له ماشومتوبه د بدر منېر نوم ډېر اورېده او فلمونو یې زیات نندارچیان درلودل. زه د بدر منېر پند ته احترام لرم؛ خو د نوموړی په فلم کې بربنډې ښځینه نڅاګانې، فحشا ته رشد ورکول او د دې تر څنګ په زیاتره ډرامو کې یې برماشۍ، زور، جنګ او جګړو ښه پیغام نه درلود، چې زه ورسره موافق نه وم. هغه په دې معنی، چې زمونږ ځوان او نوی نسل ته یې یوازې بې لاری، جنګ او جګړې او بدماشی ورښودله.

د نوموړی د فلم په لیدو تماشاچی فکر کوی، چې پښتونولی بس همدا ده، چې یوه پایڅه پورته او یوه ښکته، ټوپک په لاس او ځان هم وژنه، بل هم وژنه. تاسو به د پښتنو خوېندو د ګدر کیسې اورېدلې وی، چې هغوی مینه په ډېرې حیا سره کوله؛ مګر په دغه فلمونو کې بربنډتوب ښځینه عزت او ارزښت ته صدمه رسوی.

راځم پر اصلی موضوع بحث کوم. په پښتو فلمونو کې نور هم داسې کرکټرونه شته، چې د پښتون قوم د غرور او ارزښتونو نمایندګی کوی. چې له دې څخه امان الله ناصر، حبیب پانیزی او د دوی نور ملګری دی، چې د پښتو ډرامو ستیج ورباندې ښایسته دی. په افغانستان کې هم د ډرامو ځینی پخوانی داسې کرکټرونه وو، چې د خپلې ټولنې ترجمانی یې کوله؛ خو په دې برخه کې تر ټولو فلمونو، چې په واقیعت د افغانانو د کلتور، مذهب، احساساتو او رواجونو ترجمان فلم و، د (د کونډې زوری) و. د نوموړی فلم د ټولو اداکارانو رول د قدر وړل دی؛ خو په خاص ډول د ممنون مقصودی رول ډېر بې مثاله دی، چې د کونډې د زوی رول یې ادا کاوه. د ښاغلی مقصودی رول ډېر لوړ دی او لیدونکی داسې فکر کوی، چې دا فلم نه؛ بلکې حقیقت دی. ځانګړنه یې هم په همدې کې وه.

دا فلم ډېرې ځانګړنې لری. صحنې یې زیاتره طبیعی دی. زما په لومړی ځل کتلو سره دومره خوښ شو، چې بیا یې په تکرار ډول همېشه ګورم او خوند ترې اخلم. په دغه فلم کې د ټولنې د هغه ځوان محرومیت او بېچارګی انځور شوې ده، چې د بې کارۍ له وجې ښار ته ځی او یوه ګوله ډوډۍ پیدا کوی؛ خو ډېر ساده وی.

له ساده ګۍ څخه مې موخه عیب نه دی. ساده ګی یې هنریت لری او د رښتینولۍ او سپېڅلتوب په مانا ده. یاد فلم زمونږ د ټولنې یو ډېر مهم او اساسی ارزښت دی. اوس هم د دغه ډول فلمونو اړتیا زیاته لیدل کیږی. کاش ممنون مقصودی خپل دې لوی خدمت ته دوام ورکړی وئ، څو مونږ خپل محصول، ټولنه، رواجونه او فرهنګ خوندی کړی وئ.

افغانانو پخوا ډېر هندی فلمونه کتل. هغه فلمونه زمونږ د ټولنې سره له مذهبی او کلتوری اړخه په ټکر کې وو او د ټولنې لپاره په ګټه نه وو او نه دی. په دې وروستیو کلونو کې ترکیه د سینما په ډګر کې ځلېدلې ده، چې په مذهبی او کلتوری اساس تر هندی سینما ښه دی. خو بیا هم زه په پردیو سریالونو ډېر خوشاله نه یم، ځکه چې زمونږ خپل محصول نه دی. زمونږ په ټولنه کې زمونږ خپل ممثلین د خپلې ټولنې ښه ترجمانی کولای شی. په پای کې پر حکومت هم ژغ کوم، چې د خپلو ممثلینو د رشد او پرمختګ لپاره کار وکړی او له رسنیو څخه مې هم هیله همدا ده، چې د خپلو ممثلینو د تشویق لپاره کار وکړی.

په درنښت!

ستاسو اعلانات دلته

About خبرونه څانګه

This site uses Akismet to reduce spam. Learn how your comment data is processed.

shares